MANILA, Pilipinas — Inaasahang magkakaroon ng magkahalong galaw sa presyo ng mga produktong petrolyo ngayong Martes, Hunyo 16, kung saan bababa ang presyo ng diesel at kerosene habang maaaring tumaas o bahagyang bumaba naman ang presyo ng gasolina. Ayon sa Department of Energy (DOE), epektibo alas-6 ng umaga ang mga bagong price adjustment sa mga gasolinahan sa bansa.
Batay sa anunsyo ng DOE, maaaring magkaroon ng rollback na hanggang P0.32 kada litro o pagtaas na hanggang P1.68 kada litro sa gasolina. Samantala, inaasahang bababa ang presyo ng diesel ng P3.71 hanggang P5.71 kada litro at kerosene ng P0.50 hanggang P2.50 kada litro. Ipinaliwanag ng ahensya na nagkakaiba ang galaw ng presyo depende sa lokasyon ng mga istasyon ng gasolina, layo nito sa mga depot, at polisiya ng kani-kanilang fuel retailers.
Matatandaang noong nakaraang linggo ay nagpatupad ang mga kumpanya ng langis ng pagtaas sa presyo ng gasolina, diesel at kerosene. Dahil dito, umabot na sa net increase na P45.32 kada litro ang gasolina, P43.41 kada litro ang diesel, at P37.80 kada litro ang kerosene mula sa simula ng taon hanggang Hunyo 9, 2026.
Samantala, ikinatuwa ni Energy Secretary Sharon Garin ang mga ulat na nagkaroon ng kasunduan ang Estados Unidos at Iran upang wakasan ang kanilang sigalot. Aniya, positibong balita ito para sa Pilipinas na umaasa sa imported na langis. Batay naman sa pinakahuling datos ng DOE noong Hunyo 12, sapat ang kasalukuyang imbentaryo ng bansa para sa 46.47 araw na konsumo, kabilang ang suplay ng gasolina, diesel, kerosene, jet fuel, fuel oil at LPG.
