Niyanig ng magnitude 5.3 na lindol ang karagatan sa timog-silangan ng bayan ng Governor Generoso madaling araw nitong Biyernes, ayon sa Philippine Institute of Volcanology and Seismology.
Batay sa ulat ng PHIVOLCS, naitala ang pagyanig dakong alas-12:34 ng madaling araw. Tectonic ang pinagmulan ng lindol at may lalim na tinatayang 10 kilometro mula sa sentro ng pagyanig na nasa karagatan.
Naramdaman ang Intensity III sa bayan ng Malungon. Samantala, Intensity II naman ang naitala sa Digos City, Santa Maria, at Malapatan. Naramdaman din ang Intensity I sa Matanao at Tupi.
Ayon sa PHIVOLCS, wala namang inaasahang malaking pinsala mula sa naturang lindol. Gayunpaman, nagbabala ang ahensya na maaaring magkaroon ng mga kasunod na aftershock sa mga susunod na oras o araw.
Patuloy namang pinaaalalahanan ng mga awtoridad ang publiko na manatiling alerto at sumunod sa mga opisyal na abiso at panuntunan sa kaligtasan sakaling magkaroon ng panibagong pagyanig sa mga apektadong lugar.
