CHIZ: Panahon nang Suriing Muli ang Juvenile Justice Law upang Palakasin ang Kaligtasan sa mga Paaralan
Nanawagan si Senador Francis “Chiz” Escudero sa Kongreso na muling pag-aralan ang umiiral na mga batas sa juvenile justice kasunod ng insidente ng pamamaril sa isang paaralan sa Tacloban. Ayon sa senador, walang batas na likha ng tao ang perpekto o hindi na maaaring baguhin, lalo na kung hindi na ito ganap na tumutugon sa kasalukuyang kalagayan. Bilang isa sa mga pangunahing may-akda ng Republic Act No. 9344 o Juvenile Justice and Welfare Act of 2006 at ng Republic Act No. 10630 na nag-amyenda rito noong 2013, sinabi ni Escudero na panahon na upang magsagawa ng isang masusing pagsusuri sa batas batay sa mga datos at kasalukuyang hamon kaugnay ng pananagutan ng mga menor de edad, kaligtasan sa mga paaralan, at pag-access sa mga baril.
Ipinaliwanag ni Escudero na tanging ang mga kautusan ng Diyos ang hindi maaaring baguhin, samantalang ang lahat ng batas na ginawa ng tao ay maaaring amyendahan kung kinakailangan. Binigyang-diin din niya na maging ang mga bumalangkas ng 1987 Konstitusyon ay naglaan ng mekanismo para sa pag-amyenda nito dahil batid nilang walang sinumang mambabatas ang makapaghahanda ng batas na sasagot sa lahat ng suliraning maaaring kaharapin ng bansa sa hinaharap.
Aniya, ang muling pagsusuri sa batas ay hindi nangangahulugang nagkamali ang mga gumawa nito, kundi isang responsableng hakbang upang mapahusay, maitama, at maiangkop ito sa nagbabagong panahon para sa kapakanan ng bansa at ng kabataang Pilipino.
Nilinaw rin ng senador na nakapaloob na sa RA 9344 at RA 10630 ang mga probisyon hinggil sa pananagutan, interbensyon, at rehabilitasyon ng mga batang nasasangkot sa paglabag sa batas, taliwas sa paniniwalang hindi maaaring managot ang mga menor de edad. Sinabi niyang suportado niya ang isang komprehensibong pagsusuri sa buong juvenile justice system upang matukoy ang mga kakulangan sa pagpapatupad nito at higit pang mapalakas ang mga hakbang na magtitiyak sa kaligtasan ng publiko habang pinangangalagaan ang karapatan at kapakanan ng mga kabataan.
