MANILA, Pilipinas — Iginiit ni Senador Francis Escudero na dapat unahin ng pamahalaan ang pagpapalawak ng mga non-tax revenue sources kaysa magpatupad ng mga bagong buwis upang mapalakas ang kita ng gobyerno at masuportahan ang mga programang pangkaunlaran at panlipunan.
Ayon kay Escudero, maaaring pagkakitaan ng pamahalaan ang mga katutubong reserba ng karbon sa bansa sa pamamagitan ng transparent at kompetitibong bidding para sa exploration at production agreements. Binanggit niya na may mga coal-bearing areas sa Cagayan, Isabela, South Cotabato, at Sarangani na maaari pang mapaunlad at makatulong sa paglikom ng kita ng gobyerno.
Habang pinag-aaralan ng mga economic managers ang ilang panukalang buwis tulad ng excise tax sa matatamis na inumin, ilang produktong pagkain, Motor Vehicle Road User’s Tax (MVRUT), at buwis sa single-use plastics, sinabi ni Escudero na dapat manatiling huling opsyon ang pagpapataw ng bagong buwis at mas bigyang-pansin ang mahusay na paggamit ng mga umiiral na yaman ng bansa.
Ayon sa senador, maaaring makalikom ang pamahalaan ng hanggang P1 trilyong paunang kita at humigit-kumulang P70 bilyon hanggang P100 bilyon kada taon mula sa maayos na pagpapatupad ng mga kasunduang ito. Umaasa rin siyang patuloy na susuriin ng gobyerno ang iba pang non-tax revenue options upang masuportahan ang mga pambansang programa nang hindi nadaragdagan ang pasanin ng mamamayan.
